CLICK HERE FOR BLOGGER TEMPLATES AND MYSPACE LAYOUTS »

Tuesday, December 30, 2008

2008



هي سنه الانجازات بالنسبه لي
بدات بقرار نقلي الى احدى الاداراة المميزه في دوامي
وكنت من داخلي اتمنى انه يتم قبولي بعد الدوره الي تم عقدها الاختيار الانسب
كنا 5 وتم اختياري من بينهم و الصراحه انا ما كان عندي امل الانه الي معاي كلهم خبره اكثر مني بسنوات
بس نفعتني معرفتي بالكمبيوتر انه اتكون لي الاولويه و الحمد الله الله كتب هالنقل من نصيبي
عقبها قدمت على برنامج الدراسات العليا و تم قبولي بفضل من الله
سافرت وايد خلال هالسنه .. و احلى سفره كانت الحج و الي فعلا ما كنت مخطط لها بس سبحان الله اذا الله كتب كل شي يتيسر
اكثر شي هزني هالسنه اهو مرض عمي .. عسى ربي يتمم شفاه و يخليه لعياله
بس هم ربي ما قصر و ماختم لنا هالسنه الا ببشاره رجوعه على شهر فبراير سالم غانم اذا الله راد
وعسى ربي يطول بعمر امي و ابوي ولا يحرمنا من حسهم بالدنيا
ويوفق خواني بدراستهم ويجعلهم قره عين لنا و الوالدينا
ويرزق اختي الوظيفه الي ترضيها
و مثل ما ربي ختم لنا هالسنه بالخير يجعل 2009 خير لنا و لجميع المسلمين
و يرفع الضر عن اهل غزه و يامنهم باوطانهم
و يديم علينا نعمه الامن و الامان بديرتنا و يهدي ولاه امورنا لما يحب و يرضى
امنياتي لكم بسنه خير و حب و امان
و انه ربي يحقق لكم كل الي اتمنونه

Saturday, December 27, 2008

الوفره

اليوم كان الخيار بتجاه الوفره وهو اقتراح امي حيث انه صار لنا اكثر من سنتين ما رحنا لها
من اول ما نطرى جدامي اسم الوفره ثارت في بالي ذكريات وايد عن هالمكان الي فيه ذكريات طفولتي و صباي
ياما كنت انظر الويك اند عشان اروح مع يدتي الله يرحمها للوفره و نحي اللي مع اقارب يدتي بالسهر على المسلسلات و لعب الجنجفه
اليوم كل مكان فيها يذكرني بشي
سوق الوفره .. يا الله هالسوق شنو كان له شنه و رنه عندنا لما احد بالمزرعه يقول بروح السوق اتنط الخيلاء اول وحده
اليوم تفاجاه بالسوق غير عن الي تعودت عليه ماعاد فيه ذيك الربشه و الاوادم الي تخترش حتى الي يبيعون حيوانات صاروا شويه
اليوم كل مكان بالوفره صار غير صارت هاديه موحشه على غير العاده حتى صوب الجمعيه الي كان زحمه اليوم فاضي
اغلب المزارع معروضه للبيع و حتى المنتزهات الي كانت موجوده تسكرت الانها بدون ترخيص
على انه رحله اليوم كانت قصيره بس ثارت فيني ذكريات وااايد وااايد
منها تهديد احد اقاربي الشباب لي بالويل و الثبور و عواقب الامور اذا بطلت حلجي و قلت انه البقي انقلب فينا لوول
و طبعا انا ما اقدر ما اقول شي فا من جهه انا خايفه من التهديد و من جهه ثانيه مو قادره ما اقول حق امي
فا شسويت قمت المح على العشا ما وعيت عقب العشا الا واحد من الشباب الي كبري يناديني الخيلاء تعالي فلان يبيج
انا وقف قلبي يوم رحت له جان ايقولي انا شقلت لج مو قايل لج ياويلج اذا تكلمتي
جان اقوله اصلا انا ما تكلمت انا بس قلت صار حق ناس خو مو احنا
اليوم قريبي صاحب التهديد اب لطفلتين من احلى البنات
ابيه لا كنت صج ياهل حزتها يمكن كنت باولى متوسط :)
موقف ثاني من مواقف الوفره الي مرت علي يوم شفت المزارع
اتفاق قريبه لي تشاركني الان مقاعد الدراسات العليا مع خالها الذي يماثلنا بالعمر
على تمثيليه كانت الاسوء بالنسبه لي
انفقت اهي و ياه على انها اتقولي انها بتهاجر على القاري و جنطتها الي على ظهرها كلها كاكاو
السالفه كلها جذب بجذب بس انا اذكر اني مت من البجي صوب المحميات اقولها
حرام عليج بتهاجرين و تخليني بروح اعلم امج اتقولي امي تدري حتى ابوي عطاني فلوس و قالي هاجري
و انا مت من البجي اقولها شلون بتروحين و تخليني انا صديقتج
اتقولي تعالي معاي يبي قاريج و تعالي معاي
اقولها و امي ماقلت لها
و ارد ابجي و خالها يقول لها يلا بسرعه خل نهاجر قبل لا يصير الليل
و انا ازيد بالبجي
صج يومها لعبو فيني لعب و انا من صجي مصدقه اقولها بتخلين اهلج و خوانج
اتقولي اكتب لهم رسايل حتى انتي بكتب لج
يلا لازم اروح الحين لا اتعطليني
صج لما اذكر هالمواقف اموت من الضحك على عمري
قريبتي مازالت تشاطرني حياه العزوبيه
اما خالها فهو اب لبنت عسره الله يهديها :)
اليوم كان المشوار مشوار الذكريات بحلوها و مرها
******
ادري تاخرت بالردود على البوست الي فات
بس لاب توبي صارت فيه انفلونزا استدعت دخوله الورشه جم يوم

Sunday, December 21, 2008

ThankS


شكرا لل 9448 زائر لمدونتي



شكرا لكل من قرأ حروفي



شكرا لكل من كتب تعليق



شكرا لكل من تعلمت من احرفهم



شكرا للصداقات التي اكتشبتها من هذا العالم



شكرا لمدونتي الغاليه على احتضانها لثرثرتي و تذمري



شكرا لصديقتي جولي .. على قياتها لي لعالم المدونات



فقد امضيت الكثير من الوقت في التجول في هذا العالم كقارئه اعيش مع احرف فلانه و اتحمس الاراء فلان



اليوم .. تتم الخيلاء عامها الاول معكم و الذي استمتعت فيه بكل بوست كتبته و ابتسمت لتعليقات قراتها و احتفظت بكلمات تركت اثرها على روحي و بوستات مازالت في ذاكرتي


و اعتذر عن تقصيري بحق الجميع .. من رديت من الحج و انا ساعتي البايولوجيه اتخوره لول وهم عندي امتحانات ان شاء الله اتعدي على خير و ارجع لكم من جديد :)



Tuesday, December 2, 2008

لبيك اللهم لبيك

في الغد اغادر مع المغادرين
الملبين لدعوه الله
الي بيته الحرام للحج
اجدد العهد مع الله
و اخلص اعمالي كلها لوجهه الكريم
لا ارجو سوى رحمته و رضاه
بالغد ابدا عمر جديد
لا رفث فيه ولا فسوق
بل نيه صادقه و جهاد لله وحده
لم يكن لدي ادني نيه للحج
هذا العام و لكن يسرها لي الله من حيث لا اعلم
يصحبني اخي و امي في هذه الرحله
و تعد امي الخبيره حيث انه سبق لها الحج
قبل سنوات مضت
قلقه و متوتره من الزحام
هذا هو شعوري في هذه اللحظه
فانا لا اكاد اتصور ان يجتمع مليونين و اكثر
ببقعه واحده يتبعون المناسك ذاتها
بالاوقات نفسها
اول تعليق خطر على بالي عندما اسالتني امي
بتروحين للحج
اخاف يدوسوني الافارقه
لا اعلم لما يرتبط لدي الحج بتدوس بالافارقه
:p
ولكن جميع من حولي طمنوني انه
الموضوع اسهل من ما اتصور
لكن هذا ما يمنع اني حجزت اخوي
و كل شوي اذكره اني امانه في عنقه
بالحج .. :D
و اسال الله ان ييسر لي و لكل حاج
ويتقبل منا و منكم صالح الاعمال
و سامحوني و حللوني على اي شي بدر مني
قد يكون ضايقكم و الى ان نلتقي
استودعكم الله الذي لا تضيع ودائعه
عيدكم مبارك

Tuesday, November 25, 2008

شرايكم


حلوا
ما حلوا
حلوا
ما حلوا
حلوا
ما حلوا
شرايكم بقت اخر ورقه
حلوا ولا ما حلوه
:
:
ولا عزاء للكويت
حسبي الله و نعم الوكيل
* اعتذر لكل الي مارديت عليهم بالبوست الي طاف

Tuesday, November 4, 2008

قطيوه

هالاسبوع كان عندنا اكشن بالدوام
و كل يوم اجتماع والمشكله انه كله ملزم الحضور
مع انه انا و الي معاي بالمكتب مالنا لا ناقه ولا جمل
شكلهم يبون القاعه اتكون متروسه
:)
وطبعا لازم صراخ و نجره
و نطلع ماستفدنا شي
مع انه الجو كلش مو مال صيحه و لويه
:
:
عندنا منتدب بالدوام
الي يشوفه يقول هذا خوش ريال
ملتزم و غتره بدون عقال
ذاك اليوم الي معاي بالمكتب
اتقولي الخيلاء اتعرفين فلان
اي شفيه
جان اتقول اتصدقين مايستحي على ويهه
تخيلي داخله عليه المكتب يقولي هلا بالزين
ولا نزل عيونه والله شكيت بروحي
الله يهديه المفروض يحترم الفكر
و المظهر الي متبنيه
هذا ما يمنع انه في ملتزمين
سنع و اخلاق و رقي بالتعامل
و اربع و عشرين ساعه
المسواج بحلجه
يتسوج و يتفل تكرمون
سوري يعني بس عشان اتخيلون معاي
صج انه المسواج سنه عن الرسول صلى الله عليه و سلم
بس مو جذي له آداب و له اوقات
مو واحنا نشرح له الشغل و اهو يتسوج
و المشكله اني صرت مسؤوله عنه
الانه الي معاي باجازه
:"(
و كل ورقه يبينا نوقف على راسه
على قولته " حيث انها خبره لا افقها"
انزين و شغلي بالله منو بيسويه
:
:
اليوم كفختني نسمه هوا بارده
و انا طالعه من الدوام
جان اتخذ قرار اني اخذ اجازه دراسيه
مع انه دوامي زين وو ماشيه بدراستي الحمد الله
و كنت شايله هالفكره من بالي
بس مادري ليش طرت علي اليوم
و اعجبتني
:
:
و انا راده البيت قبل جم يوم
ولا فيه قطيوه صغيرونه
حاجزه الشارع تلعب مع الحمامه
الحمامه تطمر من مكان لي مكان
وهذي تلحقها ولا جنها بالشارع
عاد اشوه انه الشارع خالي
وقفت و خليتها تلعب ليما طارت
الحمامه على الرصيف و ركبت معاها
الا بتصيدها اتشوق
سبحان الله جنها ياهل
اغرقت باللعب و نست انها بالشارع
لو ياي واحد مطيور جان هرسها اهي
و الحمامه الي تلعب معاها
:
:
شــتــي يــا دنــيــا تــا يــزيــد
مـــوســمــنا و يــحــلــــى
:)

Tuesday, October 28, 2008

مو كل شي عادي



اعتدنا بالكويت أن كل شي عادي.. حتى الشعب مات الإحساس فيهم عادي باجر يصير عادي باجر يرضون عادي باجر ينسون


من مدونتي المتواضعة حبيت أقول للناس ان

مو عادي .. لما ينهار اقتصاد بلد و المسئولين يصرحون انه ماكو مشكله

موعادي .. عقب ما كنا أبطال الخليج الحين ممنوعين من المشاركة بالبطولة

مو عادي .. لما يقولك نبي زياده و نبي كوادر و الديره بارمه

موعادي .. لما الناس بدال لا ينبذون الإشاعات يروجونها و يزيدون النار حطب

مو عادي .. لما الأعضاء يتخبطون و ما يدرون شيسون و كل واحد يبي يأخذ دور البطولة

مو عادي .. لما يوقفون ضد الاستجواب ألان يضر مصالحهم و يحل المجلس قبل لا يستفيدون منه

مو عادي .. لما رئيس مجلس الوزراء يقدم له استجواب و ما في أي تفاعل منه

مو عادي .. إذا انحل المجلس قبل حتى لا يكمل سنه

مو عادي .. لما كنا باليوم الواحد ندخل مليارين لي ثلاث مليارات إلا ربع و الحين من 800 ألف لي مليار

مو عادي .. لما يفرق سعر البترول 19 دولار خلال هالازمه بعد ما كان يفرق 88 دولار قبل جم شهر

مو عادي .. لما الأراضي يفرق سعرها على 6 آلاف دينار و في عرض ما في طلب

مو عادي .. لما يمر شهر من غير لا تنباع البيوت

كل هالي صار و إلي بيصير مو عادي و محتاج وقفه جادة من الحكومة و المجلس و الشعب .. لازم يكون في وعي من الكل انه ماكو شي اسمه عادي في ما يختص بسياسه دوله و اقتصاد بلد و مستقبل اجيال

Saturday, October 25, 2008

ممنوع :"(



صارلي جم يوم ما اقدر ادخل البلوق
اول شي طلعلي انه خدمه بلوقر غير متوفره
و اليوم الي وراه قدرت ادخل البلوق
بس ما اقدر اعلق عند احد ولا حتى اكتب موضوع في البلوق
امس كل ما فتحت البلوق تطلعلي صفحه بيضاء مكتوب فيها
google بخط كبير


انتوا مثلي ولا بس انا
و اذا بس انا .. اتوقعون الخلل من وين ؟






Monday, October 13, 2008

غريبه

غريبه هالدنيا
تفرحنا و تبكينا
تصدنا و تعطينا
تغيرنا لياليها
:
:
بكلمه ممكن نكون فوق السحاب
و محد قدنا و مزاجنا عال العال
:
:
وبكلمه
مواجع القلب تصحى
و دموع العين تهل
و نصير بعالم غير العالم
:
:
هالكلمات مو شرط اتكون متعمده
او موجهه لنا شخصيا
قد تكون مقطع من اغنيه
مشهد من مسلسل
كلمه نقراها عند احد البلوقرز
:
:
تحملنا بمعانيها
لعالم خاص فينا
تشغل شريط ذكرياتنا
بحلوه و مره
:
:
قبل النهايه
:
:
هذا المسا لك أنت مهما تكون بعيد

Thursday, October 9, 2008

My MoOoD




&



Sunday, October 5, 2008

انتحار موجه :")



مع هالجو الي يرد الروح وصوت الموج لي الحين باذوني

طرت علي قصيده انتحار موجه

لخالد الفيصل

الشاعر الوحيد الي ينفض بشعره

الرتابه عن قلبي و مشاعري

من بد كل الشعراء الي يستهوني



من يقول الليل للعاشق الضرير
الهوى في كل وقت له نظر

شوفة العاشق عن الباقين غير
له نظر بالعين ولقلبه بصر

ساهر بالليل فارقت السرير
والبحر رفيقي بليل السهر
موجته تسري وان فكري يحير
ليت لي يا فيصل بسره خبر
تلعب الموجه وللغبه هدير
والقمر من فضته رش البحر

من غزير القاع للشط القصير
قامت من النوم في لحظة عمر

كنها عنده تثنى في حرير
أسرعت يم الحبيب المنتظر

عشقها ترقص على نسمة عبير
ترتفع ثم تنهصر ثم تنحدر

ساقها شوق على العاشق خطير
شوق من يهوى مواعيد الخطر
خلفها خواتها صفوف تسير
هايمات ما يعرفون الحذر

زفها في محفل الزار الكبير
كل مسحور بشيطانه حضر
تلتوي في ثوب ابيض
ثم تطيرفي حضن شط تحبه .. تنتحر


تصبحون على خير .. باجر دوام

:)

Tuesday, September 30, 2008

من عواده :)


عـــســاكــم مــن عــايــد الــعــيــد و مــن الــفـــايـــزيـــن

Sunday, September 28, 2008

:"(

الموت ذلك الزائر الذي يباغتنا على حين غفله
ياخذ احبابنا ولا يبقى لهم في قلوبنا سوى ذكرى
.
.
.
في صباح هذا اليوم جائني خبر وفاه
خاله انسانه لها معزه في قلبي
على الرغم من اني لم التقيها الا ان معزتها
في قلبي كبيره و قد المني هذا الخبر
فقد ذهبت لبارئها فجر ال 27 من رمضان
.
.
.
وصلت لصلاه القيام
متاخره بعض الشيئ
لئفاجئ بالامام الذي يقرا الاربع الاخيره
و الشفع و الوتر قد بدأ هو بالصلاه
.
.
عند انتهاء الصلاه و لدى عودتي للمنزل برفقه والدي
تدرين الامام بدى الصلاه مبجر الانه المسيد الي يصلي فيه التراويج طالبينه
يصلي فيهم الشفع و الوتر .. الانه الامام اليمني الي معاه بالمسيد و بالعاده يصلي الجيام
توفى امس بعد صلاه القيام .. بعد ما ام الناس بهالليله الفضيله
.
.
.
الجمت الصدمه لساني
كان بالامس يدعو الله
ان يحسن خاتمته بالامور كلها
فستجابه له الله
.
.
.
اللهم اني اسالك ميته هنيه
اللهم اجعل قبورنا بعد فراق هذه الدنيا خير منازلنا
اللهم ارزقني حسن الخاتمه
يارب لا تزيغ قلوبنا على احبائنا
.
.
.
لا حول ولا قوه الا بالله
و انا لله و انا اليه راجعون
.
.
.
اللهم : ياحنان يامنان ياواسع الغفران
اغفر لهم وارحمهم وعافهم واعف عنهم
واكرم نزلهم ووسع مدخلهم وأغسلهم بالماء والثلج والبرد
ونقهم من الذنوب والخطايا كما ينقى الثوب الأبيض من الدنس
اللهم : أبدله دارا خيرا من دارهم وأهلا خيرا من أهلهم وأدخلهم الجنة وأعذهم من عذاب القبر ومن عذاب النار
اللهم : عاملهم بما انت اهله ولا تعاملهم بما هم أهله
اللهم : ان كانوا محسنين فزد فى حسناتهم وان كان مسيئين فتجاوز عن سيئاتهم
للهم : أدخلهم الجنة من غير مناقشة حساب ولا سابقة عذاب
اللهم : انزلهم منزلا مباركا وانت خير المنزلين
اللهم : انزلهم منازل الصديقين والشهداء والصالحين وحسن أولئك رفيقا
اللهم : أجعل قبورهم روضة من رياض الجنة ولا تجعلها حفرة من حفر النار
اللهم : أفسح لهم في قبورهم ومد بصرهم وأفرش قبورهم من فراش الجنة
اللهم : أعذهم من عذاب القبر وجاف الأرض عن جنبيهم
اللهم : أملأ قبورهم بالرضا والنور والفسحة والسرور

Saturday, September 13, 2008

يا ليالي القرقيعان




قرقيعان و قرقيعان
عادت عليكم صيام كل سنه و كل عام


بكل سنه مثل هالوقت تعج فرجان الكويت بها لأهازيج الشعبية

يلبسون البنات احلي اللبس و الشباب على وقتنا دشاديش و جريمبه
ويرسمون لهم بالكحل شوارب و فوق الدشداشه وزار ..

اعشق القرقيعان من صغري و مازلت أحبه .. أحس ويه اليهال اتصير غير بالقرقيعان صح

اليوم قعدت أتذكر ذكرياتي أو بالأحرى سواد ويهي مع أمي و خالاتي لول

الله ياني كنت حنانه بس الحمد الله الحين عقلت صرت ما حب الحنة ولا الحنانين

تقول امي و العهده عليها :)

كنت من يأذن العصر ابدي الحنة .. يمه متى البس هدومي الحلوة
يمه متى بيوت ليهال و نروح نيمع حلاو بالسكه

من يحطون مدفع الافطار الاوادم تقعد على الطاوله و الخيلاء تركب فوق بتبدل و تستعد للقرقيعان

في بيت يدي ابو ابوي أحنا انروح نقرقع البنات بحماية الشباب .. كل واحد اللحيه و الشوارب مرسومه بالكحل
و الطبل و العصي جنه صج .. وطبعا بعد الوصاية العشر و التحلف كل أم اتحلف بعيالها ليما أتقول بس .. و أحنا نسمع مني و نطلع مني ..

نتجه إلى البيوت واول و اهم شرط ان ما نطلع عن مربع البيوت إلي صوبنا .. وكان في بيت كان و مازال يعطي كتكات و بطاط .. و بيت ثاني يعطي فلوس مع القرقيعان ..

عقب ما نرجع نفرش بالممر و نبدي أنقايض بعض
بنت عمي عنها شي أحبه.. و بنت عمتي عندي أشياء أتحبها.. و نتم على هالحال كل واحد حاط رأسه بجيسته ليما يمشون ..
و لما نركب فوق اتيب أمي جيس كبير .. مسمينه جيس الخياط .. هذا الجيس الله يسلمكم انتبرع فيه بكل إلي ما نحبه حق الخياط .. و مازلت هالعاده مستمرة حتى الخياط قام ينطرنا كل قرقيعان انودي جيسه .. الله لا يقطعها من عاده ..

اليوم الثاني انروح بيت يدتي ام امي .. عاد هناك ماكو إلا أنا الكبيرة عشتوا الباجي كلهم يهال .. فا ما قدر أروح اقرقع اقعد عند الزبيل احرسه .. و ياويله إذا احد من اليهال قرب منه ..

أول ما يطق الجرس.. أطير الخيلاء و بخنقها وراها أفج لهم الباب ..
و غني معاهم من قمة راسي .. ليما ينشحط بلعومي ..
عقب عاد أي الجزء الصعب على قلبي و كل جوارحي و اهو إني أعطي الحلاو إلي حارسته لليهال ..
و من ياخذون اليهال نصيبهم و يقفون .. أفج حلجي و أصيح صياح السنة بساعة.. و أروح اشتكي عند يدني الله يرحمها
خذوا حلاوي أبي حلاوي و أعفر بالصاله و للأسف الشديد انه كل هذا مسجل بالفيديو عشان تتوارثه الاجيال ..
و إذا عندي جرأه أنكر على طول يشغلون الفيديو لول .. بس يدتي الله يرحمها كانت اطيب خاطري بزبيل ثاني صغير متروس و مغلف أخذه معاي البيت و بالنهاية نصه بخت الخياط ;p


لما كبرت صارت متعتي اوزع القرقيعان و مازلت القب ب " حارسه الزبيل " و أقول لهم يلا قولوا سلم فلانه و سلم فلان ..
أعلى شقيكم ما سمع .. كنت احصل قرصه محترمه على أذوني من يدتي الله يرحمها لي قلت لهم قولوا سلم " ماما لولوه " ..
اول شي اتيني طقه على جتفي تتبعها قرصه أذن و اتقولي الله يرحمها "جم مره قلت لج لا تخلين هاليهالوا يصقعون باسمي على كبر الحوش .. وخزياه من الله بس .. مره شكبري يقرقعون علي اليهال .. الحين شيقولون الجيران " و طبعا انا بس اضحك .. الله يرحمها

الحين مازلت اعيش متعه القرقيعان .. بس الصراحة يبطون جبدي الخدم .. يخامطون اليهال مخامط
أكثر من اليهال ..

اليوم وصلنا قرقيعان فنتق الفناتق .. جان اذكر بوست استكانة عن المظاهر إلي خربت معني القرقيعان

شنو ذكرياتكم بالقرقيعان

:)

وعساكم من عواده و انتوا بخير و سعاده


Wednesday, September 10, 2008

أوسطه مغفره

طوت ايام رمضان المبارك سريعا
وها نحن ندخل الليله بالعشره الثانيه من رمضان



و هي نصف رمضان حيث العفو و المغفره من
الله سبحانه و تعالى لكل من ساهي ولاهي عن ذكره

وقال تعالى

وأن استغفروا ربكم ثم توبوا إليه يمتعكم متاعاً حسناً إلى اجل مسمى

استغفروا ربكم ثم توبوا إليه يرسل السماء عليكم مدراراً ويزدكم قوة إلي قوتكم

وماكان الله ليعذبهم وأنت فيهم وماكان الله معذبهم وهم يستغفرون

استغفروا ربكم إنه كان غفاراً يرسل السماء عليكم مدراراً ويمددكم بأموال وبنين ويجعل لكم جنات ويجعل لكم أنهاراً

وقولوا حطة نغفر لكم خطاياكم وسنزيد المحسنين



في حديث صحيح قال صلى الله عليه وسلم: "من لزم الاستغفار جعل الله له من كل هم فرجاً ومن كل ضيق مخرجاً ، ورزقه من حيث لا يحتسب



يارب اخطأت واسأت وأذنبت وقصرت في حقك، وتعديت حقوقك، وظلمت نفسي، وغلبني الشيطان، وقهرني هواي، وغرتني نفسي الأمارة بالسوء، واعتمدت على سعة حلمك وكريم عفوك وعظيم جودك وكبير رحمتك .فالآن جئت تائباً نادماً مستغفراً فاصفح عني واعف عني وسامحني وأقل عثرتي وامح خطيئتي فليس لي رب غيرك ولا إله سواك.


أستغفر الله لي وللمسلمين ، أستغفر الله لي وللمذنبين ، أستغفر الله ليوللخلق أجمعين ، أستغفر الله غفار الذنوب ، أستغفر الله ستار العيوب ،أستغفر الله حتى نقلع عن المعاصي ونتوب.


أستغفر الله حياء من الله ، أستغفر الله ولا حول ولا قوة الا بالله العلي العظيم



اللَّهُمَّ إنَّا نسأَلُكَ باسْمِكَ العَظيم الأَعْظم الذَّي إذَا دُعِيتَ بهِ أجَبْتَ، وإذَا سُئِلتَ بهِ أَعْطَيتَ، وبأسمائِكَ الحُسْنَى كُلِّها، ما عَلِمْنَا ومَا لمْ نَعْلْمُ، أَن تَسْتَجِيبَ لنا دعوَاتَنا وَتُعْتِقَنَا مِنَ النَّارِ وتُحقِّق رَغَباتَنا وَتقْضيَ حَوائِجَنا وتفرجَ كُرُوبَنا وَتَغْفِرَ ذُنُوبِنَا وَتسْتُرَ عُيوبَنا وتَتُوبَ عَليْنَا وَتُعافينَا وتَعْفُو عَنا وتُصْلِحَ أَهْلينَا وَذُرِّيَّاتَنا وَتكْلأنا بعَيْن رعايتِك وَتُحْسن عَاقِبَتَنا في الأُمُور كُلِّهَا وَتَرْحَمَنا برِحْمتكَ الوَاسِعَةَ رَحْمة تُغْنينا بها عَمن سِواك

Sunday, August 31, 2008

شهر القران


بالغد تتصف الشياطين
تنادي الملائكه بالطرقات يا باغي الخير اقبل
يتسابق الناس لفعل الخيرات
يطعمون الطعام
يخرجون الزكاه
تعج المساجد بالركع السجود


يعود علينا رمضان هذا العام
و قد فقدنا احباب لنا طواهم الثرى
افتقدنا قلوبا احببناها
شغلتنا عنهم الدنيا


رمضان فرصه لترجيح كفه موازينا بالاعمال الصالحه
لصله الارحام
للابتسامه
للامن
و الاطمئنان


شهر القران
يتسابق فيه الناس لختم القران
تراهم عاكفين في المساجد
يقيمون الليل و يرتلون القران

رمضان فرصه لكل عاصي
ان يتوب
لكل لاهي ان يرجع لجاده الصواب

اللهم اعنا على صيام رمضان و قيامه
اللهم اعده علينا سنوات عديده و ازمنه بعيده
اللهم انظر لنا فيه بعين رحمتك
و اكتبنا ووالدينا و من احبنا فيك
ومن احببنا فيك من عتقائك من النار


اللهم فرج فيه هم المهمومين
و نفس فيه كرب المكروبين

اللهم اعنا على شكرك
و ذكرك و حسن عبادتك

الله تقبل صيامنا
ولا تجعل نصيبا منه
الجوع و العطش

اللهم اعن والدي على صيام هذا الشهر الفضيل
والبسهم ثياب الصحه و العافيه
وتقبل دعوتهم و اجعلهم من عتائق من النار


اللهم اشفي عمي شفاءا لايغادره سقا
يارب اترده لبيته و لعياله
و تخفف عليه غربته
الله اني اسالك بنور وجهك العظيم
وسلطانك المبين ان لا تقضي رمضان
الا وقد اتممت شفائه
وجميع مرضى المسلمين
امين

وعسانا وياكم من الفايزين و المقبولين


Sunday, August 24, 2008

سوالف :)



في القريه التراثيه
المكان الي صورت فيه الصوره اعلاه


كان عباره عن برنامج فلكلوري و العشا

و ماقصروا بعد يقدمون لهم مشورب مجانا طول العرض

فا على ما انتهي العرض الا اهم يترنحون

و انا قايمه من مكانا بروح اغسل ايدي
جان يحكرني هالروسي الي ريحته اتبط الراس يم ساحه العرض


و دار بينا هالحوار التالي

can i take picture with you beautiful kuwaiti lady


me: No am sorry i can`t

why u are really beautiful


انا اهي صبت عظامي و طبعا كل الي بالعرض هيتوا الشو و جابلوني


و انا عيوني ادور ابوي ينقذني الانه الباجي ميتين من الضحك


ماوعيت الا ينادي واحد يم طاولته يا فلان تعال صورني مع هالحلوه

يه الثاني و اشوه كان صاحي
عاد كلمته و قلت له ما اقدر اصور معاه ومايصير و اللذي منو


و هذاك ابد مصر


بس لقيت لي فجه و طفت


شوي ولا وياينا الطاوله يقول حق ابوي


you have really beautiful girls can i take picture with them


مو بس انا حتى خواتي انضموا للقائمه


اشوه انه بالنهايه طلعنا ولا جان ابتلشنا مع هالشيبه





-2-


في اليوم الي واره كان موعدنا مع رحله السفاري
و الحمد الله الجو كان روووعه ولا باجي الايام للاسف كانت شمس
بس بالظل براد
و هذا الجو الي رافقنا بالرحله


اتشوفون الي بالارض هذا كله محار
كبااااار و مفججين كلهم بس مايندرى لقوا فيهم لولو ولا لا


-3-
اهم شي بهالرحله اني ركبت البراشوت
كان بخاطري من زمان و كنت حاطته بال wish list

والحين انتقل الي الaccomplish list


بس الي استغربته انهم كلهم بدون استثاء يعرفون الكويت

حتى العيايز الي بالقرى من اتقولين لهم الكويت

قالوا اوو petrol rich country

كل ما قالوا جذي قالتلهم خالتي

No petrol all burne because of sadam lool


الصوره اهداء لمحبين الهدوء




و هذا ما في جعبتي


:)




Friday, August 22, 2008

القادمون





اعود يسبقني شوقي لهم

لعيونهم

لكلماتهم

لاحضانهم


اعود يعتريني الوله

لعالمي

لمكتبتي

لنفسي

التي ابتعدت عنها نوعا مع

في خضم الرحلات

و الرجوع المتاخر

لاابحث فيه عن شيئ

سوى وساده تحتوي تعبي


اعود لوساده تحتوي

امالي

احلامي

دموعي

و ضحكاتي



اعود الاهلي

وقلبي يطير شوقا لهم

و عيني تتلهف رؤيتهم

و اذني تتوق لسماع اخبارهم


اعود لمدونتي

لكلماتي

و لمفضلتي


اعود مشتاقه لكل

ماسبق

فهل ما سبق مشتاق لي


:)
picture taken by me

Thursday, August 7, 2008

المغادرون

ما أن نختم الجوازات حتى نكون و يكونون في مصاف الطيور المهاجرة أجول بنظري هنا و هناك

معاريس

شهر عسل
سعادة و أمل
خطوه يديده
لحياه سعيدة

مغترب

شوق و تعب
لهفه ووله
لعيون بعيده
وقلوب قريبه
زوجه وأهل
بنت وولد

عايله

أجازه و ذكريات
وناسه و مفارقات
أم و أبو أخت و اخو
حب و أمان
طيبه و حنان

وحيد

لا حب ولا حبيب
غربه و غريب
خطوه وحيده
وليله طويلة
نظره حزينة
تفتح البوابة .. الملم أوراقي .. و استودعكم الله الذي لا تضيع و ودائعه

Monday, August 4, 2008

الهيبه


متى اتقولون انه هالانسان له هيبه

هل لما يكون من ذوي النفوذ؟


هل لما يكون حبوب و متاسمح مع الكل

اتهقون الهيبه لها علاقه بالشخصيه و البيئه

ولا الانسان يسوي حق روحه هيبه

اتلوق الهيبه على كل شخص ساعات انحس انه الشخص ايتصنع الهيبه

كل شخص له هيبه مغرور ؟

كل واحد له هيبه بين الناس ماله هيبه بين اهله ؟



الموضوع سمعته و عجبني

و الاني استمتع بأرائكم

و احب اغنيه انغام هيبه ملك

طرحته عليكم






شرايكم


:)


Friday, July 18, 2008

أسبوع حافل




شخباركم كلكم قراء و متابعين .. فقدكم من غير شر بهالاسبوع بس كنت متابعه من بعيد لي بعيد الانه أسبوع حافل و بقولكم مقتطفات منه


بلوقرز
-------

هالاسبوع كان عندي معاملات بالوزارات و البنوك
كل ما قعدت جبال موظف ولا موظفه طرى علي هالطاري

ممكن إلي أكون قاعده جبالهم بلوقر يعلقون عندي و علق عندهم
من غير ما نعرف بعض.. يمكن هذا فلان و يمكن هذي فلانه

اكثر وحده اتهيا لي بكل مكان استكانه لول
مادري ليش بس هالبنت لها معزه بقلبي مع إني ما اعرفها إلا من البلوق

ما اتراودكم هالافكار ؟


زائر الليل
--------
في الليلة الظلماء و كعادتها الخيلاء
قاعده بداري و مجابله الاب توب
و فجاه اسمع صوت تخرخش صوب باب المطبخ
تعوذت من بليس و كملت شغلي ولا زال التخرخش مستمر
اتكلت على الله و قررت اتبع مصدر الصوت و إنا قلبي بربعه
خاصة انه كل البيت نايمين و الشباب سروا
يعني الصوت مو صادر من أي فرد اعرفه لول
و اتبع الصوت ليما وصلت للمصدر الا و هم
بطات اختي 2 متنقصتهم لها بنت خالتي
و أمي قايله للخدم دخلوهم داخل عباله يركبونهم عندنا
بس من عقبها قاموا يحطونهم بالمطبخ إلي تحت
ماسوا علي الرعب إلي عشته :")

تسوق بصحبه رجل
--------------
كنت برحله تسوق بصحبه اخوي كانت ممتعه
و بنفس الوقت اكتشفت انه حتى الريايل ذوقهم صعب

يالله اعجبوه جم وحده
الخيلاء: هذي حلوه
اخوي: لا دلعتها وسيعه
الخيلاء: انزين هذي
اخوي: جمها مادري شفيه
الخيلاء:انزين هذيك
اخوي: ازرتها لي نص البطن شنو هذا
و عليه بالعافيه



رحمه ربي
-----------

الحمد الله هالاسبوع ربي سبحانه من علينا من فضله و عمي طلع من المستشفى خالي من أي اثر للمرض
من بعد رحله استمر جم شهر للعلاج من المرض الشين إلي صار مستشري عندنا بصوره فضيعه
كل بيت صار فيه حاله الله يكافينا وياكم الشر ولا يروعنا على حبايبنا
ويقر عين ابوي و اهلي بشوفته سالم غانم و يخليه ذخر لعياله يارب

و لجنه العلاج بالخارج دام عندها قرار من وزاره الصحة بتوصية من مجلس الوزراء
ليش ما يسهلون على مرضى السرطان كافي الحالة النفسية إلي يعيشونها أهل
المريض مز ناقص لجنه بكل برود ترد عليهم ما يستاهل العلاج .. مو كل الناس عندها فلوس أتعالج على حسابها
حرام ترى هذيل أحق ناس بالعلاج بالخارج دام مستشفاكم ما يستوعب هالا عداد


امتحانات
---------

آخر الشهر عندي امتحانات لا تنسوني من دعواتكم
الله يفتح علي صايره خواره جني أول مره ادرس
و الدكتورة الله يصلحها بعد عافسه الاولي على التالي و نقعد انلقط المعلومات
من كل دراسة جزء غير النوت .. بس هانت ان شاء الله كلها اسبوعين و نرتاح :)

وهذا ما في جعبتي اليوم :)


Thursday, July 10, 2008

زر عقلها

من زمان ما كتبت بوست
بس مشغووله واايد ولا انتوا عالبال
و عندي شكثر اشياء ودي اكتبها
بس ان شاء الله على الاسبوع الياي
افضى شوي و ارد امارس نشاطي

:)

هالمقطع عباره عن كاميره خفيه
يقولون و العهده عليهم انها اقوى مقلب بتاريخ الكاميرات الخفيه


بس الي مفكر فيه
و الي مخطط يسوي بالبنت المقلب
ماعندهم قلب
احد يسوي مقلب جذي
طبعا لو انا مكانها جان بيوقف قلبي من اول مره
الاني اساسا بكون راكبه السياره اعصابي متوتره بهالسرداب بروحي
لول
و لو ما وقف قلبي الاكيد انه بيزر عقلي
المفروض اتقاضيهم على هالغشمره البايخه