CLICK HERE FOR BLOGGER TEMPLATES AND MYSPACE LAYOUTS »

Monday, March 30, 2009

امطار الخير .. صور :)

اللهم صيبا نافعا
ماشاء الله هذا بحوش البيت

وهني استهلت تبارك الرحمن احنا بالجراج انتلفنا من الماي قام يدزه علينا الهوى




شوفو مرزام يارنا شلون ينزل منه طين

مشاء الله صوت المطر و الرعد كان يشوق



بردي على حافه الدريشه حسافه ما اطوله بعيد :)


الحوش كلاكيت ثاني مره


هني ما اقدر اشوف من البردي يطق على الجام و ينزل على حافه البلكونه


بزاويه بيبي بردي ابوي ميمعه




اللهم اجعلها سقيا رحمه لا سقيا عذاب ..
الحمد الله على هالمطره
بس حسافه ماقدرت اصور عدل اخاف الماي يحوش الكاميرا وتخترب

Thursday, March 26, 2009

انا و صبري

اقف على اعتاب منزلنا العامر

قاب قوسين من باب الجراج


لياتيني اتصال من زميلتي بالعمل


الخيلاء وينج؟


عند بيتنا .. في شي


تباغتني بمقدمه اعلم نهايتها ستكون عودتي لدوام

:D


تذكرين صبري


لايكون المنتدب اليديد الي عصب عليج ذاك اليوم و مشى


اي اهو الحين اتصل علي ياي بالدرب

وانا بالقسيمه مجابله العمال

تحت الشمس الحاموته

عفيه روحيله بدالي

مالنا خلق الويه


حرام عليج توني واصله البيت ومستانسه


اتصل على والدتي ابلغها اني عند الجراج وبرجع الدوام مره ثانيه


لتجيبني بعد عمري


عاد مو يتعود لكم هالصبري اي لكم على فراغته

مو مشكلتكم اذا يشتغل الف شغله وماعنده وقت فراغ


هالاخ شنو مشكلته قبل فتره كان ياي لزميلتي و كان عندها اجتماع

قالتله انطرني لما اخلص اعلمك على الي تبيه

الاخ مانطر و عصب عليها


انا جي دلوئتي و سيب اشغالي


يعني احنا ماعندنا شغل ترى بس مسيو صبري


عاد زميلتي طلعت له الويه الثاني

وحصل نزره على الخفيف و على اثرها

شاش عليها مشى وخلاها


هالمره يه على حظي


المهم رحت و نحكر بالزحمه ساعه وربع على ماوصلت له

ومايحتاج اقولكم انه رعى قلبي بالتلفزونات


حضرتك جايه

انا مستنيك عند ام فلان

و تلفونات ماتخلص


المهم وصلت و تعوذت من بليس و قلت اني بطوف و بكون صبوره معاه


الي صار انه يوم بديت اعلمه

كل كلمه و الثانيه قالي


انا عارف

اه هوه ده مش بيتعمل كده


طبعا انا صج عصبت


يعني قلبه شكبره و يعرف كل شي

عيل هالحنه و السوالف المالقه ليش


الانه تقيم المنتدبين عندي انا و زميلتي

قبل لا يجددون لهم لازم احنا نعطي ملاحظاتنا و اذا

يستاهل او لا الانه احنا الي انعاني معاهم


والاخ عباله قاعدين بجامعه بيورينا انه يعرف

وانا الفلته الخطير


يوم شفت جذي جان اقوله


عيل شنو الي ماتعرفه

هذا كل الشغل المطلوب


اصلي كنت عاوز اتاكد


اذبحه هذا


ومن عقبها قلت حق زميلتي ترى اي تلفون ماراح ارد عليه

بحقره عشان يعرف شلون يتاكد


ضيع علي الوقت الاخ على ربع ساعه جابلني فيها يستعرض مهاراته


ومن ذاك اليوم لي اليوم ماشفته ولا سمعت صوته

اقول حق زميلتي

شكله كش مني


اتقولي الا اكيد جان عطيتيه خزه من خزاتج الي ترتعد لها الفرائض

لول



الصراحه انا مو جذي و على طول ارد عليهم و حت بالتلفون اعلمهم

وتمشي الامور الانهم اغلبهم ايون العصر فيحاتجون توجيه

بس عاد موجذي حتى احنا لنا طاقه


Happy Weekend

:)




Monday, March 23, 2009

زهره الثلج

قصه من الادب الصيني للكاتبه الامريكيه من اصل صيني ليزا سي

اتكلم فيها عن التراث الصيني بلسان زهره الثلج المراه الصينيه التي تبلغ من العمر 75 سنه
و اتقص علينا طفولتها مع بنت عمها القمر الجميل

وشلون لما بلغوا 6 سنوات صار لازم انهم يربطون ريولهم بالجوارب عشان اتصير صغيره
و مقوسه حتى يضمنون الزواج من عوايل زينه و راقيه حيث كان تقوس الرجل يحدد مصير
البنت في الزواج من عوايل غنيه او متوسطه

وتذكر تجربتها من طفولتها لشبابها لزواجها و تبادلها للرسايل مع بنت عمها القمر الجميل
بلغه خاصه كانت تخترعها النساء عشان محد يعرف الحديث الي يدور بينهم
و كانت اتبادل عن طريق هالمراوح الحريره الاخبار مع بنت عمها القمر الجميل

وانا اقرا الروايه حسيت اني اشوف كرتون من قصص الشعوب جان تذكرونه
الي كانوا يحطونه من زمان

الروايه اصدار 2005

عدد صفحاتها 270 صفحه من الحجم المتوسط

ترجمه : افنان سعد الدين

اتحصلونها على موقع

Wednesday, March 18, 2009

كلاكيت ثالث مره

ثلثوا و غدا شرهم


طبعا نأمل ان يكون غدا شرهم


ما يونا بشر مستطير المجلس الياي


و ارجو انه يكون الستار قد اسدل على المسرحيه الهزليه


تنذكر ماتنعاد بالسيزن اليديد 2009- 2010


حتى نسينا ان المجلس كل 4 سنين


وعساكم من عواده


:)

اللهم ولي أُمورنا خيارنا ولا تولي أُمورنا شرارنا

اللهم وفق ولاه امورنا لما تحب و ترضاه

الله ارزق ولي امرنا البطانه الناصحه التي تعينه على الخير

اللهم اجعل هذا البلد سخاء رخاء وسائر بلاد المسلمين

اللهم اصلح لنا شئننا كله ولا تكلنا الى انفسنا طرفه عين

امين

ا

Sunday, March 8, 2009

8th of March














Today is My Birthday
بما اني بلغت من الكبر عتيا
جميع معشر البلوقرز معزومين على الحفله الميمونه

:)

و التي تقام في خيمه على طريق الوفره الزراعي جنكم رايحين الضاحيه
ترى مو مقر انتخابي خو يسويها البخت و اتحل الحكومه المحلس باجر
و عبالهم خيمتي الاحتفاليه مقر انتخابي






راح يدليكم على الخيمه اللوحات الاعلانيه للراعي الرسمي





يحي الحفل الفنان القدير صاحب الطار العجيب





طول هالاسبوع كنت قاعده استقبل كم هائل من الهدايا طبعا بوريكم صورهم


:D


طبعا الحفلات ما تحلو الا مع البوفيهات عقب وصلت الطرب
حياكم تفضلوا لا تستحون بس قبل البوفيه لازم اطفي شمعه عيد ميلادي

طبعا ماراح اقولكم My Wish :]








قبل لا تطلعون تفضلوا السفونيرات كوكيز من فيلجا مع جوكليت من بلجيكا

نسيت اقولكم انه اكو خيمه للشباب و خيمه للبنات

و ان شاء الله تستانسون بحفلتي الصغيرونه

:)

Thursday, March 5, 2009

بالامس



تاذن اشراق الشمس و انتشار اشعتها ببدا يوم جديد

ميلئ بالحب و الحيويه و النشاط


بالامس كان يوم طال انتظاره يوم مضى عليه 365 يوم

بالامس توقفنا عن حساب الثواني و الدقائق و شطب الايام من الرزنامه


بالامس عم الفرح فريجنا العامر

و اصطفت السيارات لتملئ الساحه الترابيه المقابله لنا


بالامس امتلى المنزل المهجور منذ سنه

بالضحكات و السوالف الحلوه


بالامس لمعت فلاشات الكاميرا تعكس الدموع بالماقي

و الابتسامات على الشفاه

بالامس احسست بالفرح يشع من وجه ابي

و الراحه على محيى عمتي الكبرى

بالامس احسست بمدى فقد الابناء الابيهم عندما

يحومون حوله يلتصقون به و يتسابقون للجلوس بجانبه


بالامس دخلت الفرحه الحقيقيه بيوتنا


بعد ان من الله عز وجل بالصحه و العافيه و الشفاء التام على عمي الغالي

الذي انهكته سنه الغربه و زادته وهن على وهن


بالامس نام مطمئن بين ابنائه على سريره قرير العين برؤيه احباب له قد طال انتظارهم

و طال انتظاره للقياهم


اللهم لك الحمد كما ينبغي لجلال وجهك و عظيم سلطانك


و الله يشفي كل مريض و يفرح اهله فيه مثل ما فرحنا بشفا عمي و رجعته بالسلامه