CLICK HERE FOR BLOGGER TEMPLATES AND MYSPACE LAYOUTS »

Sunday, May 31, 2009

نوابنا الافاضل.. حكومتنا الرشيده

همسه لكم

:
:

وانه قسم لو تعلمون عظيم

:
:

Wednesday, May 27, 2009

رفرف يا علم بلادي

العلم هو رمز للدول و مصدر فخر لشعبها
في كل دو ل العامل يولون ماكنه خاصه للعلم
يحرصون على نظافته و على انه يكون دوم زاهي بالوانه
بس للاسف هالشي مانشوفه عندنا بالكويت الا في شهر فبراير
يحز بالنفس لما انشوف علم الكويت يرفرف على وزاره و غباره نصه
و لوانه رايحه ما يبين الاحمر من الاخضر
حتى على المدارس و الهيئات محطات البانزين
لازم وزاره الاعلام يكون لها دور بمراقبه الجهات الي ترفع العلم اما انهم يرفعونه بشكل يليق فيه
او لا يرفعونه بهالشكل هذا رمز لدولتنا لازم يكون له قيمه و يرفرف بجمال و وقار
اغلب الاعلام الي انشوفها ما نقدر حتى نطلق عليها لقب علم
تعتبر اشباه اعلام
الي طاير يرفرف بثلاث الوان
ساعات انشوف مجموعه من الخيوط اترفرف
قبل كنت احتر و اسكت هالايام من اشوف علم شكله ما ايوز لي على طول اكلم المسؤول
وقبل فتره شرت خالتي شرت علم ودته حق مخفر منطقتنا مع السايق و اتصلت عليهم قالت لهم
جم كلمه و عقب قالت لهم ترى طرشت لكم علم مع السايق حطوه بدال علمكم المشقق
و صج من باجر الصبح و انا رايحه الدوام ولا العلم اليديد ماخذ مكان العلم القديم الي يفشل
خلونا كلنا نتكلم لي شفنا اشباه الاعلام و نطالب بعلم الكويت بالوانه الزاهيه
و بصورته الرسميه لا مقلوب ولا مقصوص
و اليوم و انا يايه من الدوام مريت اصب بانزين ولا نفس الشي العلم يفشل عاد ناديت المسؤول و قلت له
قالي اصلنا حنغيروه النهارده
عاد باجر بمر و اشوف غيره ولا لا
:)

Friday, May 15, 2009

Yes For Q8



يلي تحب الكويت لا تقطع الامال



بنات و شباب ديرتي الحبيبه

اليوم يومنا

يوم انرد فيه الجميل الام صبرت و تحملت منا الكثير

عانت بنشئتها و نشئتنا

احتضنتنا صغارا و رعتنا شبانا على امل ان نبرها

حين تحتاج لنا

شباب و بنات ديرتي

ليكون غدا تصويت نابع من القلب

من حبنا للكويت

تصويت يدل على برنا لهذه الام بأن نختار الاصلح لرعايته شؤونها

و السهر على راحتها

لنجعل شعارات سئمنا من سماعها شعارات مؤثره

تمس شغاف قلوبنا و تسقي حب الكويت

المتاصل بنا ابا عن جد

نعم للكويت

لنسمح لضمائرنا بختيار مرشحينا

لا القبليه ولا الطائفيه ولا الحزبيه

تعيننا على بر امنا الحبيبه

فقط الحب الخالص للكويت

لترابها وولاه امورها

هو ما يفيدنا في هذه المرحله

اسال الله العظيم رب العرش العظيم ان يولي امورنا خيارنا
ويعينا على اختيار الاصلح و الانفع لخير البلاد و العباد

Wednesday, May 6, 2009

في الجو

في مطار الشيخ سعد الله يرحمه نتوقف
طريج المطار ماعجبني يخرع اظلم وخالي خاصه لما ندخل الطريق الجانبي
بس شكل المطار من بره وايد حلو خاصه انه سفرتنا كانت بليل
فاكان شكل المطار جنه مطارات اوروبا الداخليه
كله زجاج و على صغره الا انه تنظيمه روووعه
استقبال من باب السياره لي الكاونتر
و العمال كلهم لابسين بدلات
و شكلهم مرتب
فوق كان ستار بوكس بواجهه زجاجيه
و قنفات مريحه و هدوء مافي الا ركاب رحلتنا
جرايد و روايه
لحد ماصار وقت البوردنق
الطياره وايد حلوه ووسيعه عكس طيران الجزيره
تونا انقول ياهادي
و استقرت الطياره بالجو
و بدوا يوزعون علينا العشا
وتبدي المطبات الهوائيه
مثل الافلام الطياره تصعد و تنزل
انا تمسكت بالكرسي
و تشهدت و قعدت استغفر
قلت ان طبت الطياره
خو بطب بالبحر
و انا ماعرف اسبح
يعني الشاركس بيتعشون وجبه دسمه
وكل مايتني هالافكار
تعوذت من بليس
و كملت استغفاري
والحريم طبعا حدث ولا حرج
وحده ياها هبوط
وحده قامت اتصرخ تبي عيالها
عطوها حبوب نوموها
الريايل قاموا يذكرون الله بصوت عالي
مع انه المطبات ماطولت اقل من 10 دقايق
والي يمي بنت اول مره اتسافر بروحها
ومضطره و قالتي قصتها الانه من لقافتي سالتها
وبديت معاها حوار
انا بروحي استغربت من روحي
انا مو من النوع الي امشي و اسولف
طبعا كسرت خاطري
لو اتشوفون ويها اشلون صار
و انا استغفر و ارد اهديها
حسيت اني مسؤوله عنها
ياربي انا بروحي عساني اشيل روحي
شلت مسؤوليه هذي
كل دقيقه الف عليها اقولها ذكري الله
ماعليج من الي يصرخون
واستقرت الاوضاع و الحمد الله طخت الطياره
و ناموا الاوادم
يوم وصلنا اخذو تعليقات عقب مارد فيهم الروح
واحد يقول انا ماني راد عليها
وكل من يعلق بصوب
المهم وصلنا و رحنا اوتيلنا و الحمد الله الي الله سلمنا
من باجر رحنا مول انتمشي
ولا المفاجاه
تن ترا را
الي امس يمي بتموت و اتشهد و مهيضه الجناح
وما تدري شتسوي بروحها و كل الوقت بتقضيه بالفندق بس بتروح اتخلص شغلها و ترد الفندق
و حملتني همها طول الرحله
سفور
صج جذب
اتصدقون هيت المحل و قمت ادقق بويها
اهي بنت بليس عرفتني صدت عني
بس انا عرفتها مجابلتي جتفي بجتفها و هاذره معاها
استغفر الله امس كان بينا و بين الموت شعره
و اهي بغت اتموت الا المفروض اذا كانت مبيته النيه على هالخرابيط
ترتدع شوي ولا اتخاف
صج صج ضااق خلقي يوم شفتها
سواء الي قالته صح او جذب
حرام ياربي خو الله موجود بالكويت و بره الكويت
صج عورني قلبي عليها وعلي
حسيتها طول الرحله تستغفلني
و يوم ردينا طلع السيت مالنا نفس الروحه
قلت حق الي معاي اذا طلعت يمي ماني قاعده
يمها
بس ماصارت معانا بالطياره مادري وين راحت
الله يستر عليها يارب و يردها للدين لرد جميل
وثبت قلوبنا على طاعته
و بالرده حاشتنا مقبلات بس مو مثل الروحه ربي لك الحمد