Me and Myself

مساء الخير على الكل

فقدت مدونتي ومتابعيني من غير شر

بس للظروف احكام

:

:

الفتره الي فاتت كانت فتره لازمني فيها الخداي بشكل كبير

و السبب الاساسي انه بالي مشغول دايما

:

1

مره من المرات كنت رايحه مشوار الصبح

و الشارع ماشي و الاشاره خضره

قرر عقلي الباطن بكيفه انه الاشاره حمره

يوم يه دوري عشان اطوف

قمت لزمت بريك و قفت انطر الاشاره تفتح مره ثانيه

مع العلم انها خضره و ربي ستر انه الي وراي مو دايس جان انا بخبر كان

تبون الصج والله فتشلت منه

حسيته بيقول هذي شلون مهيتينها بالشارع بروحها

والي يضحك اني قاعده اتحلطم بروحي

يوم صار دوري طفت الاشاره

:

:

2

قبل فتره يانا كرتون صوغه من البحرين

ملزقين عليه قابل للكسر و الاستكرزات ملوت المطار

ذاك اليوم و انا ماره صوب الكرتون

جان اشوف العباره الي مكتوبه على الكرتون

مصلى السوق

ياربي شنو مصلى السوق

احد ايب صوغه بكرتون مال مصلى السوق

وخزياه لو انا والله ماوديت حق الاوادم صوغه

بكرتون مال مصلى السوق

و اول مره بحياتي اشوف مصلى يبيعون فيه

حتى المسايد ماصار لها احترام

كل هالتحلطم ترى بيني و بين انا

ولا بمره امي جان اقولها

يمه الحين مو عيب ايب لنا صوغه بكرتون مصلى السوق

طبعا امي ابتهرت اي صوغه

قلت لها صوغه البحرين

اهي ماتت من الضحك اتقولي خلف الله عليج

مكتوب على الكرتون

"مصنع الشروق"

شلون شفتيها مصلى السوق

طبعا انا لا تعليق

فجأه صارت النقاط و الاحرف الضايعه

واضحه وضوح الشمس

وين عيني عنها قبل لا اتحلطم و انقل تحلطمي حق امي

:

طبعا هذا فيض من غيض بس عشان ما يخترب برستيجي

اتحفتكم بهالموقفين

:)

سنا الروح

بالامس كنا نقضي معهم المساء بالسمر و السوالف

تتوسطنا مطاره الحليب بالزنجبيل

و قرص العقيلي

و خبز التمر

:

:

ينتصف الليل معلن انقضاء السهر

نلملم اشيائنا

نتفق على الريوق بره

:

:

تصبحون على خير

هي الكلمه المعتاده

:

:

استيقظ بالصباح على خبر

خالتج بالأميري

اشتباه جلطه

:

:

لا استطيع ان اصف حالتي

او بالاحرى لا اتذكر الحاله التي كنت عليها

كل همي اجهز قبل لا اتمر خالتي الثانيه امي

و يروحون عني

:

:

في السياره

يعم الصمت الا من بعض الدعوات هنا و هناك

:

:

يارب الطف فيها

امس قاعده معانا مافيها شي

:

:

نصل للأميري انزل مع والدتي على عجاله

نسير كاننا مبرمجين لا نعي مايدور حولنا

كل همنا ان نكحل ناظرينا برؤيتها

:

:

نصل بوقت راوند الدكاتره

ننتظر على مضض خارج وحده القلب

:

:

يفتح الباب و ندخل

هي بوجها البشوش دائما

ببتسامتها المعهوده تستقبلنا

:

:

كل ما استطعت قوله

ماتشوفين شر

فالكلمات تتزاحم ولا تخرج

:

:

تتوالى اللاتصالات

و زميلاتها بالعمل

و الكل يردد

أمس مافيها شي

صج ابن آدم ضعيف مافيه الا لسانه

:

:

بعدها يعلن الامر انه الجلطه خارج السيطره ولا تستجيب للادويه

و يقرر نقلها للصدري للقسطره الفوريه

:

:

و التي جاءت نتيجتها انه الشريان الرئيسي مغلق

و قد تم نفخه و قد اثر هذا على اداء عضله القلب

:

:

و الان ترقد هي صابره محتسبه على السرير الابيض

تقابلنا ببتسامتها و الحمد الله التي ترددها من دخولها

:

:

نحن بانتظار تحديد مدى كفاءه عضله القلب

و قد طمئننا الطبيب المعالج ان استجابتها للقسطره و الالام التي تحس بها

هي مؤشرات جيده على انه عضله القلب قد تستعيد جزء من كفائتها المفقوده

:

:

قد مررت بهذا الموقف منذ 7 سنوات

عندما اصيب نور عيني ابوي

بالجلطه و لكن بدرجه اخف

:

:

أأمل من الله العلي العظيم ان يلطف فيها و يشافيها و يعافيها

غيره الرجال :p

:

:

مجرم .. و المشكله يكمل الجريده ما جنه توه مرتكب جريمه

:)

In Or Out

اليوم يا غالب يا مغلوب

In Or Out

الله يستر علينا و يفرحنا بالفوز

اتوقعون النتيجه لنا ولا لهم

احنا نعيش حاله من الانقسام الداخلي في بيتنا

ناس يتوقعون IN

و ناس يتوقعون Out

يا انتظاري

Still Waiting ....

بيت 5

بيت خمسه هو صالون ثقافي بالكويت يقع في منطقه جنوب السره و

يحتوي على العديد من الانشطه مثل

BooK CluB

دورات

ورش

دار سينما

هذا موقع الصالون الثقافي للي يحب

www.bait5.com

Freezing

برد

اممم

لا صقيع

غطاء و ثير دافئ

ومنبه يرنع

وارجع ااخره 10 دقائق

و تنتهى العشر دقائق

ارضخ للامر الواقع

ازيح الغطاء

و اتجه الي الدوام

في الطريق

تعن علي هوت جوكليت

امر ستاربكس

وتنتعش اوصالي برائحه الشوكولاته

و تكتنف زوايا سيارتي رائحه الكاراميل

وابليس يوسوس لي

الجو مو مال دوام

افكر اقلب الموضوع براسي

اممم لا برد مو مال طلعه كلش

احتاج مكتبي الدافي و الشمس

يدور الحديث بين زملائي

اتصدق يا بو فلان

اليوم درجه الحراره 4 الساعه 9

الله يعينا بالليل شكله صقيع اليوم

ينتهي اليوم

اعود الى بيتي

ولا حديث لنا الا البرد القارص

:)