في مطار الشيخ سعد الله يرحمه نتوقف
طريج المطار ماعجبني يخرع اظلم وخالي خاصه لما ندخل الطريق الجانبي
بس شكل المطار من بره وايد حلو خاصه انه سفرتنا كانت بليل
فاكان شكل المطار جنه مطارات اوروبا الداخليه
كله زجاج و على صغره الا انه تنظيمه روووعه
استقبال من باب السياره لي الكاونتر
و العمال كلهم لابسين بدلات
و شكلهم مرتب
فوق كان ستار بوكس بواجهه زجاجيه
و قنفات مريحه و هدوء مافي الا ركاب رحلتنا
جرايد و روايه
لحد ماصار وقت البوردنق
الطياره وايد حلوه ووسيعه عكس طيران الجزيره
تونا انقول ياهادي
و استقرت الطياره بالجو
و بدوا يوزعون علينا العشا
وتبدي المطبات الهوائيه
مثل الافلام الطياره تصعد و تنزل
انا تمسكت بالكرسي
و تشهدت و قعدت استغفر
قلت ان طبت الطياره
خو بطب بالبحر
و انا ماعرف اسبح
يعني الشاركس بيتعشون وجبه دسمه
وكل مايتني هالافكار
تعوذت من بليس
و كملت استغفاري
والحريم طبعا حدث ولا حرج
وحده ياها هبوط
وحده قامت اتصرخ تبي عيالها
عطوها حبوب نوموها
الريايل قاموا يذكرون الله بصوت عالي
مع انه المطبات ماطولت اقل من 10 دقايق
والي يمي بنت اول مره اتسافر بروحها
ومضطره و قالتي قصتها الانه من لقافتي سالتها
وبديت معاها حوار
انا بروحي استغربت من روحي
انا مو من النوع الي امشي و اسولف
طبعا كسرت خاطري
لو اتشوفون ويها اشلون صار
و انا استغفر و ارد اهديها
حسيت اني مسؤوله عنها
ياربي انا بروحي عساني اشيل روحي
شلت مسؤوليه هذي
كل دقيقه الف عليها اقولها ذكري الله
ماعليج من الي يصرخون
واستقرت الاوضاع و الحمد الله طخت الطياره
و ناموا الاوادم
يوم وصلنا اخذو تعليقات عقب مارد فيهم الروح
واحد يقول انا ماني راد عليها
وكل من يعلق بصوب
المهم وصلنا و رحنا اوتيلنا و الحمد الله الي الله سلمنا
من باجر رحنا مول انتمشي
ولا المفاجاه
تن ترا را
الي امس يمي بتموت و اتشهد و مهيضه الجناح
وما تدري شتسوي بروحها و كل الوقت بتقضيه بالفندق بس بتروح اتخلص شغلها و ترد الفندق
و حملتني همها طول الرحله
سفور
صج جذب
اتصدقون هيت المحل و قمت ادقق بويها
اهي بنت بليس عرفتني صدت عني
بس انا عرفتها مجابلتي جتفي بجتفها و هاذره معاها
استغفر الله امس كان بينا و بين الموت شعره
و اهي بغت اتموت الا المفروض اذا كانت مبيته النيه على هالخرابيط
ترتدع شوي ولا اتخاف
صج صج ضااق خلقي يوم شفتها
سواء الي قالته صح او جذب
حرام ياربي خو الله موجود بالكويت و بره الكويت
صج عورني قلبي عليها وعلي
حسيتها طول الرحله تستغفلني
و يوم ردينا طلع السيت مالنا نفس الروحه
قلت حق الي معاي اذا طلعت يمي ماني قاعده
يمها
بس ماصارت معانا بالطياره مادري وين راحت
الله يستر عليها يارب و يردها للدين لرد جميل
وثبت قلوبنا على طاعته
و بالرده حاشتنا مقبلات بس مو مثل الروحه ربي لك الحمد
12 comments:
كتابه سلسله
معاني رقيقه
تعبيرات تلقائيه
طفوله ومرح
هذه هي صاحبة المدونة
اجمل ماكتبت
عندما قالت
انا مو من النوع الي امشي و اسولف
تحس انك قاعد بصاله
وجنبك طفله تقص حكايات
رائعه هي
السلام عليكم
الحمدالله على السلامة اختي
وما انقول الا الله يهدي الجميع :)
اختى ترا ما فهمت
يعنى كانت طالعه من الكويت بحجاب وبعدين قطته
جذى قصدج
؟؟
لا حول ولا قوة الا بالله
الله يهديها ويصلح حالها
هههه
كان قلتي لها الوعد بالرده
خليها تختبص
عالفكرة المطبات الهوائية تحوش كل الطيارات و تصير فيهم بنفس الوصف اللي قلتيه و اكثر و ماله شغل اذا الطيار او الطيارة قوية او خلافه
اذكر خط سنغافورة مضيف مسك الكرسي و قال ماني طاير حتى لو اتفنش فعلا لأن الخط مال الرحلة كان جدا سيئ و اذكر انه غيروا الروت مال الرحلة بكبره من بعد افتتاح خط سنغافورة وصار اطول
@@
امبييييييييييييييييييييييييييييه
امبيه امبيه امبيه
من صجها هذي
الله يهديها و يستر عليها
:(
الحمدلله على السلامه
مره ثانيه سافري بالكويتيه علشان اتحسين انج راح اتصيرين لوست الجزء العاشر
الحمدلله على السلامة
وبالنسبة للسفور اللي تكلمتي عنها
يمكن اصلا مو متحجبه ,, هالأيام هابين
بكلمة ستر
يمكن فقط متسترة
:p
ابن السور
----------
احم احم
ترى استحيت و انا اقرى تعليقك
:")
شكرا على الكومنت
someone_q8
----------
وعليكم السلام و الرحمه
الله يسلمك
امين الله يهديها
anonymus
--------
yes
هذا الي صار بالضبط
الله يهديها
الزين
-----
امين
قلبي عورني عليها والله
الله يهديها
enter-Q8
---------
لووول
اهي بس شافتني قامت اتصدد
فعلا المطبات حاشت كل الي
كانوا رايحين على نفس الخط بنفس اليوم
اشوه انه مكان قريب
ولا سنغفورا لا يحوشك 7 ساعات بقعد على اعصابي
:)
darkness
--------
اي اي اي
نفس تعبيري يوم شفتها
الله هديها
jolie Q8
هلا و غلا
تو مانورت البلوقات
:)
لا حجاب عدل بو قوطي روب بعد
بس الزاهر مع المطبات صار عندها خلل
الله يهديها
Post a Comment