اعمال موسميه :)

... مساء البرد الزمهرير

اليوم الجو روعه .. صج برد يدخل بالعظم بس بعد يونس .. من زمان مايانا برد جذي .. احب هالاجواء الانها تعني اني اقدر امارس اشياء واايد احبها بهالجو ..

اشرب جاي حليب .. هالشي ما اسويه الا من اشتا لي اشتا حيث اني مو من شريبين الجاي ولا اي نوع من المنبهات.. بس يحلى بعيني جاي الحليب بالشتا .. كيف بعيد عنكم ;p

الشوي .. و اه من الشوي هوايتي الشتويه المحببه .. الكل يعرف حبي لها ومستغلين هالشي عدل احم احم .. اتصدقون مادري ليش احبها .. من كثر ما احب اجابل الدوا .. لازم كل عطله ربيع اتحوشني نفاضه و برد و احصل لي جم كلمه لول .. بس بعد ما اقاوم الدوا و السنه اللهب الي طالعه منها " الله يجيرنا من النار ".. ساعات نشوي غدا او عشا او مارشملو حبيب الشعب رواد شاليهنا الكرام من اليهال و الكبار .. وقت شوي المارشملو اصير انا العزيزه عند الكل .. و الكستن واااو لما يتفجر ما احب اسوي فيه فتحات قبل الشوي .. استانس

اشوف ردات الفعل اذا انفجروا وحده ورى الثانيه .. شريره لول

حليب الزنجبيل .. من اطقوس الليليه و الصباحيه .. ما احب اشربه الا بالشتا و اصلا ما يسونه الا بلاجواء الي مثل اليوم .. بس اليوم ما في :( بس ان شاء الله انعوضها بالايام اليايه .. يقول العييري انه نص يناير برد شديد وناسه :) .. و ان شاء الله ربي يرزقنا معاه المطر مثل امس

على طاري المطر .. احب ريحه الارض عقب المطر .. عجيبه .. مع انها ساعات اترد على ريحه غبار بس استانس عليها.. احس انها اترد الروح حق الارض وتروي عطشها من عقب صيف طويل و حار ... بس شكلنا السنه بنفلس من النوير خاصه البنفسجي .. احبه احس اذا شفته انه صج بدا موسم الربيع

و بعد احب بهالاجواء خاصه اذا كان المطر سحابه كريمه من رب كريم مثل امس اروح البحر .. بس على شرط احد يمشيني بدون كلام لول .. ما احب اسوق بهالجو خاصه اذا كان الغرض من السياقه التمشي عشان اسرح ابخيالي على راحتي من غير ما احاتي احد الف عليه ولا اشاره اطوفها :).. و اذا الي بيمشيني او اتمشيني ايكملون احسانهم و يشغلون فيروز و يشترولي هوت جوكلت ساعتها يصير او تصير و صلتني للقمه و اتصير هذي الطلعه طلعه الموسم

و انشوفكم على خير في بوست يديد و موسم يديد :)