CLICK HERE FOR BLOGGER TEMPLATES AND MYSPACE LAYOUTS »

Wednesday, February 27, 2008

قصه الورده


مساء الورد :)

شلونكم مع اول يوم دوام من عقب الاجازه و عقب باجر اجازه بعد :/

الاشعار .. الروايات .. المقالات الي اتكون فيها افكار مبتكره و بعيده عن النمطيه اتشدني واستمتع بقرائتها و احس انه الي اكتبوها
ناس مبدعين و عندهم ملكه عاليه في الكتابه و التفكير
قصه الورده
قال لي ماتت الوردة نسى إحســــــاسه اللي مات
نسى حبي وحناني وقســوته وكيف كان يعاملني
عطاني وردة حمرا الصبح وماتت بعدها بساعات
وحتى بموتت الوردة أعـــــــــــــز الناس يعايرني
أكيد بتموت هالـــــــــوردة تركتها بأحوج الأوقات
نسيت إنه العطش يذبـــــح ذبحتها وجيت تذبحني
جزاك الله يا خلي خير فــــرشت لي دربي بجمرات
وأنا أمشي وأنا ســـــــــــاكت وأقول الله يصبرن
يغريبة كيف أنا أسامــــــــــح وإنته تزيد هالغلطات
واذا أخطيت أنا بلا قصد أشـــــــوفك ما تسامحني
غريبة كيف أسمـــــــــــــح لك تطالعني بهالنظرات
واذا إني جيت أضحك لك أشــــــوفك إنت تحرجني
تعبت أمشي أنــــــــــا بدربك ودربك ممتلي ثغرات
وإنته تقـــــــــول لي إصبر وغصب عني تصبرني
وكل ما قلت لك خلنا نريح تسرع الخطـــــــــــوات
يا خلي قـــــــــــــول يعني ليش بهالقسوة تعاملني
اذا حبي وسط قلبك ذبل فــــــــــــــي يوم والا مات
أو إنك خــــــــــــذت ما تبغي وبعد هذا شبعت مني
تكلم قــــــــــــــول لا تسكت وخلنا نجلب الصفحات
وكل واحد يــــــــــروح بدرب بس لازم تصارحني
أنـــــــــــــــا مابيك تحس بذنب أو تندم على مافات
ولكني أبيك تقــــــــــــــــــــــول إنته شفيك ريحني
أبسمع كل مافقلبك أبسمع لـــــــــــــو بعض كلمات
وأنا متوقـــــــــــــــــع إنك لو حكيت لابد تصدمني
واذا إنته تهمك الوردة تعال إسقيها لــــــو قطرات
وصدقني بتتفتــــــــــــــــــــــح بتعجبك وبتعجبني
واذا إنها ما تهمك لا تعيشها وســــــــــــط ظلمات
بيديك إدفنها بالتربه عسى غيـــــــــــرك لها يحني
الشاعر / طارق المحياس



Friday, February 22, 2008

عيدي يا كويت يا اغلى بلد




عاد عيدج يا كويت يا عسى عيدج يعود


كـــل عــام و انــتـــي مــمــيــزه


كل عام و حبج بقلبنا يكبر اكبر و اكبر


كل عام و انتي بامان و محفوظه من الي ماتنام عين


كل عام و انتي شرف و عزه و فخر لكل كويتي


كل عام و انتي ديرتنا الي غيرها ماحابينا

كل عام و انتي في تطور و ازدهار


كل عام و عيالج الطيبين يحمونج


كل عام و انتي اتشوفين اعدائج يندفنون بمزبله التاريخ واحد ورى الثاني


كل عام و انتي بخير يا امنا الحبيبه و بيتنا

Tuesday, February 19, 2008

حقج علينا ياكويت



بيان مجلس الوزراء الصادر امس ان دل فانما يدل على ضعف و خوف واضح بحجه عدم اثاره الفتن

نعلم و يعلم الجميع انه هذا ليس هو الخطا الاول الذي يرتكب من هذا الحزب بحق الكويت .. فقد كان هذا الحزب و مازال يسعى بشتى الطرق للنيل من الكويت عن طريق اشاعه البلبله و القتن في صفوف المجتمع فهل يرقى رد الحكومه البسيط لهذه الاعمال



هل يكفينا الشجب و الاستنكار و الاعتذار الذي نادى به كل من مبارك الخرينج و وليد الطبطبائي في مقابله مع تلفزيون الوطن ?
هل اعتذارهم يكفي لتهدئه النفوس التي اسثاروها و يسترجع الشهداء الذين ذهبوا ضحيه لمحاوله اغتيال الامير الراحل و شهداء ركاب الجابريه ?

الوطنيه و المواطنه موضوع لا يقبل المساومه يا حكومتنا الرشيده و الاولى ان يكون مجلس الوزراء هو حامي حمى رايه الوطنيه و هو من يرفعها بوجه كل من يتعالى على الكويت و اهلها..

بيان مجلس الوزراء تصريح للكل بان الكويت تتغاضى عن الغلط بحقها و تقبل الاعتذار البسيط الخجل ..

النائبين المتورطين بهذا الاحداث .. يسرحون و يمروحون الان في فرانكفورت .. و من يدري لعلهم يخططون لحركه جديده او للانخابات القادمه .. فقد امسى طبيعيا ان يعلو احد الكراسي الخضراء اصحاب السوابق الامنيه الخطيره كحال عبدالصمد .
انه رجل ذو سجل اسود قد سبق و ان حكم عليه بالاعدام لولا تدخل سامي لكان الان مع مغنيه بنار جهنم .. وما كان ليصرح انه التسمي باسم حزب الله هو شرف لا يستحق ..

كيف سمحت الحكومه لشخص خائن سبق ان قام باعمال تخريبيه و ضمن جماعه اعدمت ان يدخل المجلس يدير البلد بفكره المنحرف و يكون قواعد .. كان الاجدر ان يكون مكان هذا النائب هو السجن ابد الابدين .. على مرتكبه في احداث مكه لا التكريم بدخول قاعه عبدالله السالم و التحدث بلسان الشعب
الذي اصبح اليوم بريئ منه الا من فئه قليله قام الخائن بغسل ادمغتها

***




سامحينا ياكويت على بيان الحكومه
سامحينا يا كويت مو هذا قدرج
سامحينا انه ارخصناج و اغليتينا

سامحينا انج صرتي وسام على صدر مايحمل لج ذره ولاء
سامحينا انه ماراعيناج حق الرعايه
سامحينا اذا تغير شعار البعض على مرئ و مسمع منا و ماحركنا ساكن

حقج علينا يا كويت

Monday, February 18, 2008

وقفه مع الاحداث

update
عدنان عبدالصمد + احمد لاري+ عبدالمحسن جمال
نومني من الشعب الكويتي لمشاركتهم في تابين المقبور
نتمنى من الحكومه اقصائهم من الكويت
****
مطلوب وقفه جاده من الحكومه
اتجاه عدنان عبدالصمد خلال جلسة مجلس الوزراء غدا .. فالموضوع لا يجب ان يمر مرور الكرام خاصه بعد تبجح الاخير و تفاخره بتابين المقبور مغنيه
مطلوب وقفه جاده من اعضاء مجلس الامه :
يرفضون فيها وجود هذا المرتزق بين اركان ارقى صرح بالكويت صرح الوطنيه و الديمقراطيه و يطالبون الحكومه باسقاط حصانته و تتبعها باسقاط جنسيته .. فالجنسيه الكويتيه شرف لا يستحقه مسيو عدنان
مطلوب وقفه جاده من الشعب :
لمحاسبه كل من يقصر في اداء واجبه و يتهاون عن اعلاء الحق .. حق الكويت و الشهداء و الشعب .. من الاعضاء و ممثلي الحكومه و الصحفين و المدونين .. من من اختاروا لعب دور المتفرج دون ادنى انكار لما يحدث على الساحه ..
****
سؤال للسيد المتشدق الحامل رايه الدفاع عن المقبور مغنيه
ماهو رايك في تصريح السيد المهري ؟
نتمنى ان تملك الشجاعه لتستل سيفك البتار و تشهره بوجه المهري كما سبق و اشهرته بوجه وزير الداخليه مهددا الاخير بتخاذ الاجراءات الدستوريه ضده .. في حين انها يجب ان تؤخذ ضد من خدع الشعب بمبادئ ابعد ما يكون هو عنها
ما رايك في نسبه 75% من الشعب يطالب باسقاط حصانتك و تحويلك للمحكمه؟
***
اللهم لا ترفع لهم رايه واجعلهم لمن خلفهم ايه
اللهم اجعل هذا البلد امنا مطمئنا سخاء رخاء
اللهم من ارادنا و بلدنا و حكومتنا بسوء فشغله في نفسه و جعل تدبيره تدميرا عليه
اللهم قنا شر الفتن ووحد صفوفنا و اراب صدعنا و جعلنا كالبنيان يشد بعضهم بعضا
اللهم امنا في اوطانا
اللهم امين

Friday, February 15, 2008

No Comment

حزب الله الكويتي يعزي بـ استشهاد الحاج المجاهد

"عماد مغنيه"

حسبي الله و نعم الوكيل

حزب الله فرع الكويت هو " التحالف الاسلامي الوطني " و طبعا ما يخفى على احد ممثلين هالحزب بالمجلس

وين الوطنيه بتعزيه الحزب الام .. بمقتل احد اهم الاشخاص المصنفين على قائمه الارهاب و الشخص الي عيش الكويت و اهلها برعب لايام و ليالي

الاهم انهم معزين بمقتل المجاهد .. وين الجهاد .. شنو سوا بحياته غير التشريد و التخويف بحق مسلمين كل ذنبهم انهم خالفوه بعقيدته


اما عن الحزب الي عندنا اقول لهم

هذي هديتكم بالكويت بشهرها المميز

هذي احتفالاتكم بالعيد الوطني و عيد التحرير

هذا تعبيركم عن الولاء لهالارض الطيبه الي عطتكم و مابخلت عليكم

و للكويت الي كل يوم تنصدم بعيالها اقول

لله درك يا كويت دام هذيل صاروا يتكلمون باسمج و صاروا اعضاء ابرلمانج و يتشرفون انهم يحملون جنسيتج

لحكومتنا الكريمه اقول

مطلوب قفه جاده .. بس حرام عليكم الي قاعد يصير

الكويت ماتستاهل .. كل من قام ينهشها من صوب

لكم رواد بلوقي الكرام اقول

الكويت عزيزه بعيالها الشرفاء الي يحقون الحق و ينكرون الباطل

اذا احنا ما رفعنا شان ديرتنا محد بيرفعه
****
بيان جمعيه الاصلاح و مؤيدين الاختلاط
من يقرا بيان جمعيه الاصلاح
و
من ينتظر رد المؤيدين على البيان
يــحــســدنــا
الانه ديرتنا مافيها الا هالمشكله و من بعد ما يحلونها الاخوان المختلفين في الراي بكل رقي و عقلانيه مثل ما شفنا في
البيان الصارد من جمعيه الاصلاح و الذي يزخر بالورع الديني و الحث على تماسك المجتمع وان اختلفت الاراء
سيتم التفرغ الاستقبال الطلبات المقدمه من عدد من الدول تطلب فيها ان يقوم الخبراء الكويتين ذوي العقول الفذه و البصيره النيره و الاستراتيجيات الواضحه باعطائهم دورات في فن اداره الازمات و اتخاذ القرارت و كتابه البيانات المحايده ..
على ان تقدم هذه الدروس بالتعاون مع جميع الاحزاب و التكتلات و الجمعيات و الهيئات و الي يدري و الي مايدري تحقيقا لمبدا المساواه
همسه للجرايد و القائمين عليها
لا تخلون الناس تطمع بالعقول الفذه الي عندنا ولا تعطونهم سر الخلطه السريه للاوضاع السحريه بالكويت

Wednesday, February 13, 2008

The Gift






اختي : الو .. الخيلاء .. حركات من ورانا ها


انا : شنو اي حركات؟


اختي: واصلت لج هديه بالدي اج ال


انا : يلا عاد عن الخرابيط .. مادري منو بيطرشلي هديه


اختي : والله العظيم .. و من الامارات بعد


انا :جيكي الاسم اخاف مو لي بالغلط


اختي : حقج .. صج مو متعلمه عالهدايا لول .. مكتوب اسمج و عنوانا


انا : من منو ؟


اختي : مادري .. مو واضحه الكتابه

الو .. بفتحها


انا : فتحيها .. بس اذا ورد يويلج اذا لمستيه


اهي : وايد متامله .. يلا باي


*****


هذا الحوار صار بيني و بين اختي .. اليوم الصبح


امم اهي اتكلم و انا بوادي ثاني .. منو مطرشلي هديه من الامارات ما اعرف احد .. بالامارات


اشتغل الخيال ..

يمكن ورد

يمكن شي عجيب من دكان العجايب

يمكن كاكاو

يمكن كتاب

يمكن تذكره سفر لول


منو هالانسانه ولا الانسان الي فكر فيني و انا مادري


شعور حلو انه في احد يفكر فيج بهالعالم و انتي ماتدرين .. اتذكرج بفرحها ولا حزنها و انتي ماتدرين عنها


اليوم عشت هالشعور الحلو .. صج استانست .. و انا اتخيل شكل العلبه يمكن بيضا بفيونكه حمرا ولا ورديه .. طوايله .. دائريه ولا مربعه؟


هالتفكير قصر علي وقت الدوام .. و بالدرب و انا راده كنت حدي متشوقه اشوفها


اول ما وصلت سيده الصاله ولا اختي تنطرني


انا : ليش مافجيتيها؟


اهي : كسرتي خاطري قلت هديتج انتي فجيها


اتصدقون ترددت و انا ابطلها .. مع اني كنت مستانسه فيها .. خاصه فكره انه في احد تذكرني


يوم فجيتها ولا المفاجاه .. صج ضحكنا ضحك



اختي: ورد ها انا قلت ماوراج ورد ولا شي .. مادري ليش عصبت :)


انا كنت ميته من الضحك و امي معاي


تدرون شطلعت


شركه سيارتي دازين لي شهاده شكر داخل برواز الاني صرت عميله عندهم و كاتلوج السياره اليديد

انزين مايحوي ..جان طرشوها من فرع الكويت.. بس حلو السسبنس الي عشته ;p
بس خيالي طلع صح بالنسبه للون العلبه .. طلعت بيضه .. توقعتها مربعه اطلعت مستطيله :( و بدون فيونكه


و لما قريت اسم المرسل من بره طبعا يالله يبين .. ولا وحده اسمها تمارا من العلاقات العامه


بس تدرون فرحتي بالاحساس الي حسيته كانت احلى هديه


شكرا .. مدام تمارا انج عيشتيني هالشعور


و ان شاء الله المره اليايه اتصيب و اتكون احد الاختيارات اعلاه :)

Saturday, February 9, 2008

Amazing Show

video

Monday, February 4, 2008

ليش وصلنا هالمرحله؟

تـــحــديـــث
الماده 30
الحريه الشخصيه مكفوله
الماده 36
حرية الراي والبحث العلمي مكفولة ، ولكل انسان حق التعبير عن رايه ونشره بالقول او الكتابة او غيرهما ، وذلك وفقا للشروط والاوضاع التي يبينها القانون .
و نحن اصحاب المدونات .. نرفض سلبنا حريات كفلها لنا الدستور
*****
-1-




الابو طريح الفراش يصارع المرض .. الاطباء شاكين انه يعاني من سرطان .. العمام و العمات و عيالهم و كل من يعر هالريال الطيب واقفين معاه بشدته ..



اي الولد العود .. و على مسمع و مرئ من الكل ..


" يمه بسافر باجر البحرين مع رفيجي نستانس .. قبل لا يروح امريكا يدرس"


الام " اي مايخالف روح استانس "


هالحوار كله جدام الاوادم الي قاعده ترس الدار .. لو ما واحد من عمامه زفه جدام هالامه الي قاعده .. جان خذى جنطته و سافر


****


-2-

الام مريضه .. ما اتحرك من فراشها .. كل الي اتمتع فيه نعمه البصر فقط ..


قاعده ابيت بروحها .. مع الممرضات .. العيال مايدرون عنها .. و بناتها من ديره لي ديره ..

واحد بس من عيالها اهو الي فيه الخير باع بيته و قعد عند امه ..
جازوه اخوانه و خواته بالمحاكم و شهروا فيه و دوه الطب النفسي و سوه مدمن مخدرات .. كل هذا الانه طلع الماجرين و قعد مع امه .. وخافوا لا يبصم الام و ياخذ البيت

ماراعوا صورته جدام عياله .. سيرته الي صارت على كل لسان .. و المشكله انهم يمشون و يحجون باخوهم انه مينون و انه مدمن ..

****

ليش وصلنا هالمرحله من القسوه .. الاخو ياكل اخوه .. يشهر فيه عشان الفلوس ؟


الولد يهمل ابوه و اهو بعز حاجته له .. ابوه الي مابخل عليه بشي .. و الي مستعد يفديه بروحه لو يطلبه .. عشان وناسه اسبوع ..


ليش انعدمت الرحمه من قلوب البشر .. ؟


ليش عقوق الوالدين صارت شي هين عند الناس ؟

****

الموقفين الي فوق يعتبرون ولا شي بالنسبه للهوايل الي نسمعها كل يوم و الثاني .. و كلها تبتدي و تنتهي عند نفس النقطه .. انا و من بعدي الطوفان ..
الولد يقولج خل استانس لاحق على ابوي ..
الاخوان .. يقولون لج الدنيا مالها امان .. و بليس شاطر .. باجر يبصم امنا و ياخذ البيت .. و نطلع احنا اوت


****
بس بهالحالتين محد فكر بشعور الام ولا الابو الي ربي حب يمتحنهم و يختبر بر اعيالهم لهم .. شنو بيكون شعورهم و اهما يشوفون روحهم على اخر سلم الاولويات بالنسبه لعيالهم .. اي مشاعر بتضارب فيهم و اهما يشوفون العيال الي سهروا و شقوا عليهم و كانوا يتفاخرون فيهم بين الناس عند اول تجربه حقيقيه اتبين وبرهم و حبهم حق اهلهم .. يعطونهم ظهرهم و يمشون .. واحد يتحجج انه والله اخوانه و خواته يقومون فيه و الثانين .. احنا اقصرنا حاطين لها استاف ممرضات ..


يدتي الله يرحمها دايما كانت اتقول لنا " ماسويت يا ابن ادم يسوا لك "


و اكيد حوبه هالام و الابو ماراح اتعداهم .. كافي الحسره الي كاتمينها بقلوهم على تربيتهم لعيالهم

اللهم اعنا على بر والدينا .. اللهم انا نسالك رضاهما و نعوذ بك من عقوقهما ..