الهجره

اليوم يايتكم و بجعبتي حكايه يديده او موضه يديده مستشريه باوساط الشباب خاصه .. و اهي موضوع الهجره

يعني بالمنتديات باليمعات و و صلت حتى الدوانيات .. قالولي مصادري لول .. ودنا انهاجر و دنا انروح مكان يقدرنا .. اهني ماكو تقدير .. الديره صايره اتضيق الخلق كل شي ممنوع .. وين زمان بابا جابر الله يرحمه وين الحين .. انحس مقموتين .. ماكو فرص .. العيشه غاليه ..

انا الصراحه لما اسمع هالنقاشات ايضيق خلقي .. اذا هذا تفكير شبابنا جيل المستقبل .. مو قادرين ايتحملون الظروف الصعبه الي اتمر فيها الكويت .. و تعتبر هالفتره اهي اول فتره حرجه يعيشونها و اهي واعين و مدركين للمشاكل و حجمها ..

يعني اجدادنا الي عانوا بالغوص و ايام ماكانت الكويت صحرا مافكروا يهدونها .. و كافحوا و ارخصوا الغالي عشانها ..

ايام الغزو الي الوضع كان جدا مزري و صج الواحد مايدري شنو يواجه باجر .. لا ديره ولا مستقبل و معاش و لا امن ولا شي .. مجرد شخص بهالدنيا .. الناس تكاتفه و صارت ايد وحده و رجعوا ارضهم و حولوا و بذلوا جهدهم كله عشان ترجع مثل اول و احسن ..

احنا الحين الي الحمد الله كل شي متوفر لنا .. من امن و امان و خير .. الناس اتمنى اتعيش بهالديره .. ايتذابحون و يدفعون دم قلبهم عشان ياخذون الجنسيه ولا حتى يدخلون بفيز عمل .. عشان ايتمتعون بخير هادليره .. اني احنا اعيالها انتنازل عنها بهالسهوله ..

شنو ممكن يلقونه بره مو موجود بالكويت .. خل يطالبون فيه و يحاسبون المقصر .. الي يحسون في اوضاع غلط .. يكتبون عنها .. ايصارحون اصحاب القرار .. يوقفون هالشباب و البنات وقفه وحده بويه كل ظاهره مو عاجبتهم ..

جدام اول تحدي بيهدون الديره و يدورون مكان اريح .. هالديره بمثابه الام لنا .. بعد ما كبرتنا و علمتنا وتعتبت معانا .. انجازيها بالنكران والجحود.. انجازيها انا نعطيها ظهر نا وننكر كل الي سوته لنا .. ما انشوف الا عيوبها و ننسى مميزات

عن نفسي يحز بخاطري و اتضايق اذا سمعت هالكلام من الشباب البنات .. الي اهما الامل حق هالديره و اهما يفكرون بهجرتها .. و بدال لا يساعدنا و يمدون لها ايدهم .. يهجرونها و يتجاهلون ندائاتها